Trwy ein Rhaglen Iechyd a Lles, sefydlwyd partneriaethau cryf gyda gwasanaethau Early Intervention for Psychosis (EIP) ledled Cymru. Gweithiwyd ochr yn ochr â’r gwasanaethau arbenigol hyn i ddatblygu rhaglenni Therapi Antur, gan gyfuno theori therapiwtig â phrofiadau ymarferol awyr agored i feithrin gwydnwch emosiynol, lleihau stigma ac atgyfnerthu rhwydweithiau cymorth cymdeithasol.

Mae Y Bartneriaeth Awyr Agored yn aelod o Is-grŵp Therapi Antur Cymru Gyfan ac yn gweithio gyda’r saith Bwrdd Iechyd i ymgorffori Therapi Antur fel elfen gydnabyddedig a chynaliadwy o gefnogaeth iechyd meddwl ledled Cymru. Mae’r gwaith hwn yn gyrru newid systemau drwy ddylanwadu ar sut mae gwasanaethau iechyd meddwl yn ymgysylltu â gweithgareddau awyr agored, gan symud y canfyddiad o’r awyr agored fel cyfle hamdden i’w weld fel offeryn gwerthfawr ar gyfer atal, adfer a lles.

O ganlyniad, mae gwasanaethau wedi newid eu dulliau gwaith, gan ddatblygu llwybrau atgyfeirio cryfach, adeiladu perthnasoedd â phartneriaid y trydydd sector ac ymgorffori ymyriadau awyr agored yn eu dulliau gofal. Rydym wedi cefnogi timau iechyd meddwl i gael mynediad at ddarpariaeth awyr agored, cysylltu â phartneriaid cyflwyno ac sicrhau cyllid ar gyfer ymgysylltiad hirdymor drwy sefydliadau fel Moondance Foundation a ffynonellau lleol eraill.

Rydym yn ymrwymedig i barhau â’r gwaith hwn ac ar hyn o bryd yn cefnogi dau brosiect ymchwil sy’n archwilio effaith Therapi Antur ar wydnwch emosiynol, lles a chysylltiadau cymdeithasol, gan helpu i adeiladu’r sylfaen dystiolaeth ar gyfer ei fabwysiadu’n ehangach ar draws gwasanaethau iechyd.